سۆزىمىزنىڭ خۇلاسىسى: ھېيت نامىزىدىكى ئارتۇق تەكبىرلەر توغرسىدىكى ئىختىلاپ سەۋەبىدىن مۇسۇلمانلارنىڭ بىرلىكىنى پارچىلاش، نامازنى قايتا ئوقۇش توغرا بولمايدۇ. ھېيت نامىزىنى ھەر بىر جامائەت-گۇرۇھ ئۆز ئالدىغا ئايرىم ئوقۇش بولسا دىندا ئىنكار قىلىنىدىغان بىدئەت ئىشلارنىڭ جۈملىسىدىندۇر. شۇنداقلا مۇسۇلمانلارنىڭ بىرلىك سېپىنى پارچىلاشتۇر، ئەقلى-ھوشى جايىدا بولغان كىشى ئۈممەتنى بۆلىدىغان بۇنداق ئىشنى قىلمايدۇ. بىر قېتىم سەلەپى قاراش بويىچە يەنە بىر قېتىم ھەنەپىي قاراش بويىچە ھېيت نامىزى ئوقۇيمىز دېگەن سۆز توغرا ئەمەس. ھەممەيلەن پەيغەمبەرئەلەيھىسسالام ۋە ساھابىلەرنىڭ يولىدىن ئىبارەت بىر يول بىلەن ئىبادەت قىلىشقا بۇيرۇلغان، بۇ يول بولسا ئىمام ئەبۇ ھەنىپە، ئىمام مالىك، ئىمام شافىئى ۋە ئىمام ئەھمەد قاتارلىق ئىسلام ئالىملىرىنىڭ تۇتۇپ ماڭغان يولىدۇر. ساھابىلار ۋە باشقا ئىماملارنىڭ قىلىشقان ئىختىلاپلىرى يوللۇق ئىختىلاپ بولۇپ، بۇ ئىختىلاپ ئۈچۈن كۆڭلى-كۆكسىمىزنى كەڭرى تۇتىشىمىز لازىم. ئاللاھ تائالا بارلىق مۇسۇلمانلارنى ھەق يولدا مۇستەھكەم قىلسۇن. ئۇلارنىڭ قەلبىنى ھەقىقەتكە بىرلەشتۈرسۇن. ئاللاھ تائالا ھەممىدىن ياخشى بىلگۈچىدۇر.